YOUSSOU N´DOUR

O senegalés Youssou N’Dour leva varias décadas sendo un dos máis destacados embaixadores da música africana, sempre en permanente conversa coas sonoridades do resto do mundo.

Que se lle coñeza sobre todo por aquel “7 Seconds” que facturou xunto a Neneh Cherry non deixa de ser un pouco inxusto, polo que ten de visión incompleta dunha carreira tan rica que explorou desde múltiples perspectivas a música popular do seu país, o mbalax, os ritmos afrocubanos, o pop ou o rock, e cuxos discos sempre depararon argumentos de moito peso, máis aló de que colaborase puntualmente con Bruce Springsteen, Peter Gabriel, Tracy Chapman, Manu Dibango ou Paul Simon. Trátase dun xigante da música do noso tempo.